Үйлчилгээний нөхцөл

1. Ерөнхий заалт

1.1. Энэхүү Үйлчилгээний нөхцөл (цаашид «Нөхцөл» гэх) нь Асуу Цэг Апп ХХК-ийн эзэмшиж, ажиллуулдаг Asuu.Travel цахим платформыг ашиглахтай холбогдон үүсэх харилцааг зохицуулна. Үүнд Платформоор дамжуулан аяллын үйлчилгээ захиалах, санал болгох, төлбөр төлөх, хүлээн авах харилцаа хамаарна.

1.2. Нөхцөл нь Платформыг ашиглаж буй бүх хэрэглэгчид, тэр дундаа аялагч болон үйлчилгээ үзүүлэгчид үйлчилнэ. Зөвхөн аялагчид, эсхүл зөвхөн үйлчилгээ үзүүлэгчид хамаарах заалтыг тухай бүрд нь тусгайлан заасан.

1.3. Та бүртгүүлэхдээ «Би Үйлчилгээний нөхцөл болон Нууцлалын бодлогыг зөвшөөрч байна» гэсэн нүдийг сонгосноор энэхүү Нөхцөлийг хүлээн зөвшөөрнө. Цахим хэлбэрээр хүлээн зөвшөөрсөн нь бичгээр байгуулсан гэрээтэй адил хүчинтэй. Бүртгүүлээгүй зочинд Платформыг ашиглах хүрээнд 16, 17, 21 дүгээр зүйл үйлчилнэ. Нөхцөлийг зөвшөөрөхгүй бол Платформд бүртгүүлэх, захиалга хийх, үйлчилгээ санал болгох боломжгүй.

1.4. Нөхцөлийн хувилбар, түүнийг өөрчлөх журмыг 25 дугаар зүйлд заасан.

2. Нэр томьёо

2.1. Энэхүү Нөхцөлд хэрэглэсэн дараах нэр томьёог дор дурдсан утгаар ойлгоно:

• «Асуу Цэг Апп ХХК», «бид» гэж Монгол Улсад бүртгэлтэй, 4291263 регистрийн дугаартай, Платформыг эзэмшиж, ажиллуулдаг хуулийн этгээдийг;
• «Asuu.Travel», «Платформ» гэж asuu.travel вэб сайт, хэрэглэгчийн бүртгэл, үйлчилгээ үзүүлэгчийн удирдах хэсэг (цаашид «удирдах хэсэг» гэх) болон тэдгээрээр дамжуулан үзүүлж буй цахим үйлчилгээг;
• «Хэрэглэгч», «та» гэж Платформд бүртгүүлсэн, эсхүл Платформыг ашиглаж буй хувь хүнийг;
• «Аялагч» гэж Платформоор дамжуулан үйлчилгээ захиалж буй, эсхүл захиалсан хэрэглэгчийг;
• «Үйлчилгээ үзүүлэгч» гэж Платформд бүртгүүлсэн хөтөч, буудаллах газар, аяллын компани, Харилцагч, мөн Платформд тухайн төрлийн бүртгэл нээгдсэн үед даатгалын газрыг нийтэд нь (Харилцагчид энэхүү Нөхцөлийн зөвхөн 1–5, 7, 16–26 дугаар зүйл үйлчилнэ);
• «Хөтөч» гэж аялагчдад замчлах, хөтлөх үйлчилгээ үзүүлдэг хувь хүнийг;
• «Буудаллах газар» гэж аялагчдыг хүлээн авч байрлуулдаг малчин өрхийн гэр, кемп, ресорт, амралтын газар, гэст хаус (зочны байшин), рашаан сувилал, зочид буудал зэргийг;
• «Аяллын компани» гэж Монгол Улсад бүртгэлтэй, аялал жуулчлалын чиглэлээр үйл ажиллагаа явуулдаг компанийг;
• «Даатгалын газар» гэж Монгол Улсад аяллын даатгалын үйлчилгээ үзүүлэх зөвшөөрөлтэй хуулийн этгээдийг;
• «Харилцагч» гэж үйлчилгээ үзүүлэгчийн зөвшөөрлөөр Платформоор түүнтэй холбогдсон бөгөөд тухайн үйлчилгээ үзүүлэгчид ногдох төлбөрийг хүлээн авдаг татвар төлөгч хувь хүн, эсхүл хуулийн этгээдийг;
• «Захиалга» гэж аялагч тодорхой үйлчилгээ үзүүлэгчийн үйлчилгээг тодорхой өдрүүдэд, эсхүл тодорхой хуваарьт аялалд авахаар Платформоор үүсгэсэн, «AB-» гэж эхэлсэн дугаартай бүртгэлийг;
• «Хүсэлт» гэж үйлчилгээ үзүүлэгчийн хариуг хүлээж буй захиалгыг;
• «Хуанли» гэж хөтчийн өдөр бүрийг «Нээлттэй», «Завгүй» гэж тэмдэглэсэн, эсхүл тэмдэглээгүй байдлаар, буудаллах газрын нэгжийн төрөл бүрийн хоног бүрийг нээлттэй, хаалттай, эсхүл улирлын гадуур байдлаар харуулсан хуваарийг;
• «Аялал» гэж төлбөр нь төлөгдсөн захиалгын дагуу үзүүлэх үйлчилгээг: хөтчийн өдрүүд, буудаллах газарт буудаллах хоногууд, эсхүл хуваарьт аялалд оролцохыг;
• «Багц» гэж хөтөч, эсхүл аяллын компанийн тогтсон маршрут, хоногийн тоо, насны ангилал бүрийн үнэ бүхий аяллын саналыг;
• «Хуваарьт аялал» гэж багцыг тодорхой эхлэх өдөртэй, тодорхой тооны суудалтайгаар зарласныг;
• «Суудал» гэж хуваарьт аялалд нэг аялагч оролцох боломжийг;
• «Сонирхол» гэж аялагч багцыг хүссэн хугацаа, аялагчдын тоогоо заан сонирхож буйгаа илэрхийлснийг;
• «Хоног» гэж буудаллах газарт нэг шөнө буудаллахыг; «орох өдөр», «гарах өдөр» гэж буудаллах газрын захиалгын эхний болон сүүлийн өдрийг (гарах өдөр хоногт тооцогдохгүй);
• «Ажилтан» гэж буудаллах газар, аяллын компанийн эзэмшигчийн удирдах хэсэгтээ урьж оруулсан менежер, ажилтныг;
• «Хөтөч–компанийн холбоо» гэж аяллын компани ба хөтөч харилцан зөвшөөрч Платформд холбогдсоныг;
• «Нийт үнэ» гэж захиалга илгээх үед тогтоосон, аялагчийн төлөх үйлчилгээний үнийг;
• «Төлсөн дүн» гэж тухайн захиалгын нийт үнийн төлбөрт Асуу Цэг Апп ХХК-ийн бодитоор хүлээн авсан мөнгө болон 13 дугаар зүйлийн дагуу өмнөх захиалгаас шилжүүлсэн дүнгийн нийлбэрийг;
• «Шимтгэл» гэж Платформын үйлчилгээний хөлсөнд нийт үнээс Асуу Цэг Апп ХХК-ийн суутгах хэсгийг;
• «Урьдчилгаа» гэж нийт үнээс тохиролцсон хувиар тооцож, аялал эхлэх өдөр үйлчилгээ үзүүлэгчид шилжүүлэх, түүнд ногдох дүнгээс хэтрэхгүй хэсгийг;
• «Үлдэгдэл» гэж үйлчилгээ үзүүлэгчид ногдох дүнгээс урьдчилгааг хассан хэсгийг;
• «Торгууль» гэж төлбөр нь төлөгдсөн захиалгыг цуцалсны төлөө үйлчилгээ үзүүлэгчийн 11.4-т заасны дагуу Асуу Цэг Апп ХХК-д төлөх анзыг;
• «Буцаалт» гэж аялагчийн төлсөн мөнгийг энэхүү Нөхцөлийн дагуу түүнд буцаан шилжүүлэхийг;
• «Цуцлалтын хураамж» гэж аялагч захиалгаа цуцлахад 10.3-т заасны дагуу буцаан олгохгүй үлдэх хэсгийг;
• «Аялал эхлэх өдөр» гэж захиалгад заасан эхний өдрийг, буудаллах газрын хувьд орох өдрийг;
• «Аялал дуусах өдөр» гэж захиалгад заасан сүүлийн өдрийг, буудаллах газрын хувьд гарах өдрийг;
• «Үнэлгээ» гэж аялагчийн захиалгынхаа дагуу үйлчилгээ үзүүлэгчид өгсөн 1-ээс 5 хүртэлх од, бичсэн сэтгэгдэл, эсхүл хоёуланг;
• «Ажлын өдөр» гэж Монгол Улсын хууль тогтоомжоор тогтоосон амралт, баярын өдрөөс бусад даваа гарагаас баасан гараг хүртэлх өдрийг.

2.2. Энэхүү Нөхцөлд заасан огноо, хугацааг Улаанбаатарын цагаар тооцно. Огноог он-сар-өдөр (YYYY-MM-DD) хэлбэрээр бичнэ, жишээ нь 2026-10-01.

3. Asuu.Travel-ийн үүрэг ба талуудын харилцаа

3.1. Asuu.Travel нь аялагчийг үйлчилгээ үзүүлэгчтэй холбож, захиалга, төлбөр тооцоог зохион байгуулдаг цахим платформ юм. Асуу Цэг Апп ХХК аяллын үйлчилгээг өөрөө үзүүлдэггүй, түүнийг өөрийн нэрээр худалддаггүй. Бид аялагчид Платформоор захиалга хийх боломж олгож, захиалгын төлбөрийг үйлчилгээ үзүүлэгчийн төлөөлөгчийн хувиар хүлээн авч, энэхүү Нөхцөлийн дагуу үйлчилгээ үзүүлэгчид шилжүүлэх, эсхүл аялагчид буцаан олгоно.

3.2. Аяллын үйлчилгээг захиалгад нэр нь заагдсан үйлчилгээ үзүүлэгч өөрөө үзүүлнэ. Тухайн үйлчилгээ үзүүлэгч үйлчилгээний чанар, аюулгүй байдал, хууль ёсны байдлыг бүрэн хариуцна. Захиалга баталгаажсанаар аялагч болон үйлчилгээ үзүүлэгчийн хооронд тухайн үйлчилгээг үзүүлэх харилцаа үүснэ.

3.3. Асуу Цэг Апп ХХК дараах үүргийг хүлээнэ:

• а) Платформыг ажиллуулах, захиалгын мэдээллийг үнэн зөв бүртгэж хадгалах;
• б) аялагчийн төлбөрийг хүлээн авах, энэхүү Нөхцөлийн дагуу буцаалт хийх;
• в) шимтгэлээ суутгаад үйлчилгээ үзүүлэгчид ногдох төлбөрийг түүний Харилцагчид шилжүүлэх;
• г) үйлчилгээ үзүүлэгчийн бүртгэлийн мэдээлэл, бичиг баримтыг Платформд нийтлэхээс өмнө 3.6-д заасан хүрээнд шалгах;
• д) гомдлыг 23 дугаар зүйлд заасны дагуу хүлээн авч шийдвэрлэх.

3.4. Аялагч Платформоор хийсэн захиалгын төлбөрийг зөвхөн Асуу Цэг Апп ХХК-д төлнө. Ингэж төлснөөр аялагч тухайн захиалгаар үйлчилгээ үзүүлэгчид төлөх үүргээ бүрэн биелүүлсэнд тооцогдох бөгөөд үйлчилгээ үзүүлэгч уг төлбөрийг аялагчаас дахин шаардахгүй. Тухайн захиалгын төлбөрийг үйлчилгээ үзүүлэгчид шууд бүү төлөөрэй. Платформоос гадуур төлсөн мөнгөнд энэхүү Нөхцөлийн буцаалтын журам үйлчлэхгүй.

3.5. Үйлчилгээ үзүүлэгч нь Асуу Цэг Апп ХХК-ийн ажилтан, төлөөлөгч биш, бие даасан этгээд юм. Үйлчилгээ үзүүлэгч нэгэн зэрэг бусад байгууллагатай хамтран ажиллаж, Платформоос гадуур захиалга авч болно. Харин Платформоор захиалга хийсэн аялагчийн хувьд 6.5 үйлчилнэ.

3.6. Бид үйлчилгээ үзүүлэгчийн ирүүлсэн бичиг баримтын бүрдэл, хүчинтэй хугацаа, бүртгэлийн мэдээлэлтэй нийцэж буй эсэхийг бүртгэлийн үед шалгана. Энэ шалгалт нь бичиг баримт жинхэнэ гэдгийг бүрэн баталгаажуулахгүй бөгөөд бид үйлчилгээ үзүүлэгчийн үйл ажиллагааг байнга хянахгүй. «Батлагдсан», «баталгаажсан» гэдэг нь зөвхөн энэ шалгалтыг давсныг илэрхийлэх бөгөөд үйлчилгээний чанар, үйлчилгээ үзүүлэгчийн үйлдэлд баталгаа гаргасан хэрэг биш.

3.7. Платформоор ямар төрлийн үйлчилгээ захиалах боломжтой болохыг Платформд харуулна. Шинэ төрлийн үйлчилгээ захиалах боломж нээгдвэл энэхүү Нөхцөл түүнд мөн адил үйлчилнэ. Тухайн үйлчилгээний онцлог нөхцөлийг захиалгын хуудсанд тусгана.

4. Бүртгэл, насны шаардлага, аюулгүй байдал

4.1. Платформд бүртгүүлэх, захиалга хийхийн тулд та 18 нас хүрсэн, иргэний эрх зүйн бүрэн чадамжтай байх ёстой. Бүртгүүлснээр та энэ шаардлагыг хангаж байгаагаа баталж байна.

4.2. 18 нас хүрээгүй хүн аялалд оролцох бол түүний эцэг, эх, асран хамгаалагч, эсхүл түүнийг хариуцах насанд хүрсэн хүн захиалгыг өөрийн бүртгэлээр хийнэ. Тэр хүн аяллын туршид насанд хүрээгүй хүнийг хариуцна.

4.3. Бүртгүүлэхдээ та нэрээ гадаад паспортад бичигдсэнтэй адил латин үсгээр бичиж, имэйл хаяг, нууц үгээ оруулна. Таны оруулсан мэдээлэл үнэн зөв, бүрэн байх ёстой. Мэдээлэл өөрчлөгдвөл «Миний бүртгэл» хэсэгт шинэчилнэ. Энэ мэдээллийг таны захиалга, аяллын бичиг баримтад ашиглана.

4.4. Нэг хүн нэг бүртгэлтэй байна. Нэг бүртгэлээр аялагчаар захиалга хийх, үйлчилгээ үзүүлэгчээр бүртгүүлэх, Харилцагч бүртгүүлэх боломжтой.

4.5. Бүртгүүлсний дараа таны имэйл хаяг руу баталгаажуулах холбоос илгээнэ. Дараах үйлдлийг хийхийн өмнө имэйл хаягаа баталгаажуулсан байх шаардлагатай: захиалга хийх, төлбөр төлөх, захиалга цуцлах, буцаалтын маягт бөглөх, үнэлгээ бичих, цомогт зураг оруулах, мэдээнд сэтгэгдэл бичих, багцад сонирхол илэрхийлэх, ажилтны урилгыг хүлээн авах, үйлчилгээ үзүүлэгчээр бүртгүүлэх. Холбоос тодорхой хугацаанд хүчинтэй. Хугацаа нь дууссан бол шинэ холбоос авч болно.

4.6. Та нууц үгээ бусдад задруулахгүй, бүртгэлээ бусдад ашиглуулахгүй байх үүрэгтэй. Таны бүртгэлээр хийгдсэн үйлдлийг таны хийсэн гэж үзнэ. Бүртгэлийг тань Платформын аюулгүй байдлын зөрчлийн улмаас, таны буруугүйгээр ашигласан нь тогтоогдвол энэ заалт үйлчлэхгүй. Бүртгэлийг тань зөвшөөрөлгүй ашигласан, эсхүл нууц үг тань задарсан гэж сэжиглэвэл нууц үгээ даруй сольж, info@asuu.travel хаягаар бидэнд мэдэгдэнэ үү.

4.7. Гэр бүл, найз нөхөд, бүлгийн гишүүдийнхээ өмнөөс захиалга хийж буй хэрэглэгч тэдний өмнөөс үйлдэл хийх эрхтэй байх ёстой. Тэрээр тэдэнд энэхүү Нөхцөл, Нууцлалын бодлогыг танилцуулж, тэд Нөхцөлийг мөрдөхийг хариуцна.

5. Үйлчилгээ үзүүлэгчээр бүртгүүлэх, баталгаажуулалт

5.1. Имэйл хаягаа баталгаажуулсан хэрэглэгч «Үйлчилгээ үзүүлэгч болох» хуудаснаас үйлчилгээ үзүүлэгчээр бүртгүүлж болно. Нэг хэрэглэгч зөвхөн нэг хөтчийн бүртгэлтэй байж болох бөгөөд олон буудаллах газар, олон аяллын компани бүртгүүлж болно. Харилцагчийн хувьд нэг хэрэглэгч хувь хүний нэг Харилцагч, хуулийн этгээдийн олон Харилцагч бүртгүүлж болно.

5.2. Үйлчилгээ үзүүлэгч өөрийн үндсэн мэдээллийг монгол, англи хэлээр үнэн зөв, бүрэн бөглөж, удирдах хэсэгт заасан бичиг баримтыг (жишээ нь иргэний үнэмлэх, гадаад паспорт, хөтчийн үнэмлэх буюу гэрчилгээ, улсын бүртгэлийн гэрчилгээ, итгэмжлэл) хавсаргана.

5.3. Бүртгэлийн өргөдөл дараах шатаар шийдвэрлэгдэнэ:

• Ноорог — үйлчилгээ үзүүлэгч мэдээллээ бөглөж байна;
• Хүлээгдэж буй — үйлчилгээ үзүүлэгч шаардлагатай бүх мэдээллийг бүрдүүлж илгээсэн, Асуу Цэг Апп ХХК шалгаж байна. Энэ үед мэдээллээ засах бол үйлчилгээ үзүүлэгч өргөдлөө буцаан татна;
• Батлагдсан — Асуу Цэг Апп ХХК мэдээлэл, бичиг баримтыг шалгаж зөвшөөрсөн;
• Татгалзсан — Асуу Цэг Апп ХХК өргөдлийг татгалзсан, эсхүл өмнө өгсөн зөвшөөрлөө цуцалсан. Шалтгааныг удирдах хэсэгт харуулна. Үйлчилгээ үзүүлэгч дутуугаа нөхөж, дахин илгээж болно.

5.4. Зөвхөн «Батлагдсан» бөгөөд «Идэвхтэй» (20 дугаар зүйлийн дагуу түдгэлзүүлээгүй, хориглоогүй) төлөвтэй үйлчилгээ үзүүлэгч Платформд нийтэд харагдаж, захиалга авна.

5.5. Бүртгэл батлагдсаны дараа үйлчилгээ үзүүлэгчийн хувийн болон бүртгэлийн үндсэн мэдээллийг (овог, нэр, регистрийн дугаар, хуулийн этгээдийн нэр зэрэг) зөвхөн Асуу Цэг Апп ХХК өөрчилнө. Ийм мэдээлэл өөрчлөгдвөл үйлчилгээ үзүүлэгч бидэнд мэдэгдэнэ.

5.6. Асуу Цэг Апп ХХК нэмэлт бичиг баримт шаардах, бүртгэлийг зөвшөөрөхөөс татгалзах эрхтэй. Мөн өмнө өгсөн зөвшөөрлөө шалтгаанаа заан цуцалж болно.

5.7. Үйлчилгээ үзүүлэгчийн иргэний үнэмлэх, гадаад паспорт, хөтчийн үнэмлэх зэрэг бичиг баримтыг Платформд нийтлэхгүй. Тэдгээрийг зөвхөн баталгаажуулалт хийх Асуу Цэг Апп ХХК-ийн эрх бүхий ажилтан үзнэ.

5.8. Үйлчилгээ үзүүлэгчээр бүртгүүлснээр та энэхүү Нөхцөлийн үйлчилгээ үзүүлэгчид хамаарах заалтыг хүлээн зөвшөөрнө. Энэхүү Нөхцөлийг цахим хэлбэрээр хүлээн зөвшөөрсөн нь бичгээр байгуулсан гэрээтэй адил хүчинтэй бөгөөд 5–7, 11 дүгээр зүйл, түүний дотор торгуулийн тохиролцоо үйлчилгээ үзүүлэгчид шууд үйлчилнэ. Үйлчилгээ үзүүлэгч Платформоор хийгдсэн захиалгын төлбөрийг үйлчилгээ үзүүлэгчийн нэрийн өмнөөс хүлээн авах, энэхүү Нөхцөлийн дагуу буцаан олгох, шимтгэл, торгууль, буцаалтын дүнг суутгах эрхийг Асуу Цэг Апп ХХК-д олгоно. Асуу Цэг Апп ХХК тухайн үйлчилгээ үзүүлэгчтэй тусдаа бичгээр гэрээ байгуулж болно. Ийм гэрээ энэхүү Нөхцөлөөс зөрүүтэй бол тухайн үйлчилгээ үзүүлэгчийн хувьд гэрээ давуу хүчинтэй.

5.9. Хуулийн этгээд (аяллын компани, байгууллага хэлбэрийн буудаллах газар, хуулийн этгээд Харилцагч) бүртгүүлж буй хэрэглэгч тухайн хуулийн этгээдийг төлөөлөх эрхтэй гэдгээ баталж байна. Бүртгүүлснээр тухайн хуулийн этгээд энэхүү Нөхцөлийн үйлчилгээ үзүүлэгчид хамаарах заалтыг хүлээн зөвшөөрсөнд тооцно. Төлөөлөх эрхгүй нь тогтоогдвол бүртгүүлсэн хэрэглэгч энэхүү Нөхцөлөөр хүлээх үүргийг өөрөө хариуцна.

5.10. Буудаллах газар, аяллын компанийн эзэмшигч имэйл хаягаар менежер, ажилтан урьж удирдах хэсэгтээ оруулж болно. Ажилтан эзэмшигчийн нэрийн өмнөөс захиалгад хариулах, цуцлах, аялал дууссаныг баталгаажуулах зэрэг үйлдэл хийх бөгөөд эзэмшигч ажилтныхаа үйлдлийг өөрийн үйлдэлд тооцож хариуцна. Эзэмшигч ажилтны үүргийг хэдийд ч өөрчилж, эрхийг нь дуусгавар болгож болно.

5.11. Аяллын компани хөтөчийг хөтчийн дугаараар урьж, эсхүл хөтөч компанид хүсэлт гаргаж, нөгөө тал зөвшөөрснөөр хөтөч–компанийн холбоо үүснэ. Аль ч тал холбоог хэдийд ч дуусгавар болгож болно. Компанийн багцын хуваарьт аяллыг холбогдсон хөтөч хөтлөх бол тухайн өдрүүд хөтчийн хуанлид хадгалагдана.

6. Үйлчилгээ үзүүлэгчийн үүрэг

6.1. Үйлчилгээ үзүүлэгч дараах үүрэгтэй:

• а) Платформд нийтэлсэн мэдээлэл, зураг, үнэ, үйлчилгээний тодорхойлолтыг үнэн зөв, шинэчлэгдсэн байлгах;
• б) хуанлиа бодит байдалд нийцүүлэн хөтлөх;
• в) хүсэлтийг Платформд заасан хугацаанд багтаан хүлээн авах, эсхүл татгалзах;
• г) баталгаажсан захиалгын үйлчилгээг захиалгад заасан өдрүүдэд, нийтэлсэн тодорхойлолтын дагуу үзүүлэх;
• д) үйл ажиллагаандаа шаардлагатай тусгай зөвшөөрөл, үнэмлэх, гэрчилгээг хүчинтэй байлгах;
• е) Монгол Улсын хууль тогтоомж, аюулгүй ажиллагааны журмыг мөрдөх;
• ж) орлогын татвар төлөх болон хуулиар хүлээсэн бусад үүргээ өөрөө биелүүлэх;
• з) аялагчийн гомдол, Асуу Цэг Апп ХХК-ийн лавлагаанд цаг алдалгүй хариу өгөх.

6.2. Хуанлийн өдрийн төлөв дараах утгатай:

• «Нээлттэй» — үйлчилгээ үзүүлэгч тухайн өдөр захиалга авахыг урьдчилан зөвшөөрсөн. Бүх өдөр нь «Нээлттэй» захиалга үйлчилгээ үзүүлэгчийн нэмэлт зөвшөөрөлгүйгээр шууд «Төлбөр хүлээж буй» төлөвт шилжинэ. «Нээлттэй» өдөрт үйлчилгээ үзүүлэгч Платформд заасан хязгаарт багтаан нэмэлт төлбөр тогтоож болно;
• «Завгүй» — захиалга, хүсэлт хүлээн авахгүй;
• Тэмдэглээгүй — аялагч хүсэлт илгээж, үйлчилгээ үзүүлэгч түүнийг хүлээн авах, эсхүл татгалзана.
• Буудаллах газрын хоног — буудаллах газар нэгжийн төрөл бүрээр хоног бүрийг нээлттэй, эсхүл хаалттай байдлаар, улирлаа тогтоон хөтөлнө. Хаалттай, улирлын гадуурх хоногт захиалга авахгүй. Нээлттэй хоногийн захиалга шууд «Төлбөр хүлээж буй» төлөвт шилжинэ;
• Хуваарьт аяллын суудал — худалдаа хаагдах хүртэл суудал хүрэлцэж байвал захиалга шууд «Төлбөр хүлээж буй» төлөвт шилжинэ.

6.3. Үйлчилгээ үзүүлэгч баталгаажсан захиалгатай өдрүүдийг өөр зорилгоор ашиглахгүй, тэдгээр өдрийн үйлчилгээг өөр хүнд худалдахгүй. Хуанлийн тэмдэглэл аялагчдад харагдаж болох тул тэмдэглэлдээ хувийн мэдээлэл бичихгүй.

6.4. Хүсэлтээс татгалзах бол шалтгаанаа бичнэ. Шалтгаан аялагчид харагдана. Платформд заасан хугацаанд хариулаагүй хүсэлт автоматаар хаагдана. Хүсэлтэд байнга хариулахгүй байх нь 20 дугаар зүйлд заасан арга хэмжээ авах үндэслэл болно.

6.5. Үйлчилгээ үзүүлэгч Платформоор захиалга хийсэн аялагчтай тухайн захиалгын үйлчилгээг Платформыг тойруулан тохиролцох, түүний төлбөрийг Платформоос гадуур авах, аялагчид Платформоос гадуур төлөхийг санал болгохыг хориглоно. Захиалгад багтсан үйлчилгээнд нэмэлт төлбөр нэхэхгүй. Захиалгад ороогүй нэмэлт үйлчилгээг аялагчтай урьдчилан тодорхой тохиролцоно.

6.6. Төлбөр төлөгдсөний дараа үйлчилгээ үзүүлэгчид харагдах аялагчийн холбоо барих мэдээллийг (18.2) зөвхөн тухайн захиалгын үйлчилгээг үзүүлэх зорилгоор ашиглаж, Хүний хувийн мэдээлэл хамгаалах тухай хуулийн дагуу хамгаална. Үйлчилгээ үзүүлэгчийн ажилтанд мөн адил үйлчилнэ.

6.7. Баталгаажсан захиалгыг үндэслэлгүйгээр цуцлахгүй. Цуцлахаас өөр аргагүй бол аль болох эрт удирдах хэсгээс шалтгаанаа бичиж цуцална. Энэ тохиолдолд 11 дүгээр зүйл үйлчилнэ. Хуваарьт аяллыг цуцалбал түүний бүх идэвхтэй захиалга цуцлагдаж, 11 дүгээр зүйл захиалга бүрд үйлчилнэ.

6.8. Бүх өдөр нь «Нээлттэй» байсан захиалга, эсхүл үйлчилгээ үзүүлэгчийн хүлээн авсан хүсэлтийн хувьд төлбөр төлөх хугацаа дуустал хуанлийн өөрчлөлт тухайн захиалгад нөлөөлөхгүй. Аялагч хугацаандаа төлбөл үйлчилгээ үзүүлэгч үйлчилгээг үзүүлэх, эсхүл 11 дүгээр зүйлийн дагуу цуцлах үүрэгтэй.

6.9. Аялал дуусах мөчид (8.12) үйлчилгээ үзүүлэгч, эсхүл түүний ажилтан аялал дууссаныг удирдах хэсгээс баталгаажуулна. 7.4-т заасны дагуу үлдэгдлийг шилжүүлэхэд энэ баталгаа, эсхүл 8.12-т заасан хугацаа өнгөрсөн байх шаардлагатай.

7. Шимтгэл, төлбөр шилжүүлэх, Харилцагч

7.1. Асуу Цэг Апп ХХК Платформын үйлчилгээний хөлсөнд захиалгын нийт үнээс тогтоосон хувиар шимтгэл суутгана. Шимтгэлийг аялагчаас нэмж авахгүй бөгөөд энэ нь холбогдох татварыг багтаасан дүн байна.

7.2. Шимтгэлийн хувь нь бүх үйлчилгээ үзүүлэгчид нэгэн адил үйлчлэх ерөнхий хувь, эсхүл тухайн үйлчилгээ үзүүлэгчтэй тохиролцсон хувь байна. Үйлчилгээ үзүүлэгчид үйлчилж буй шимтгэл, урьдчилгааны хувийг удирдах хэсгийн «Төлбөр тооцоо» хуудсанд харуулна.

7.3. Захиалга илгээх үед хүчинтэй байсан шимтгэл, урьдчилгааны хувь тухайн захиалгад тогтмол үйлчилнэ. Дараа нь хувь өөрчлөгдсөн ч өмнө хийгдсэн захиалгын тооцоо өөрчлөгдөхгүй.

7.4. Үйлчилгээ үзүүлэгчид ногдох дүн нь нийт үнээс шимтгэлийг хассан дүн байна. Урьдчилгаа тохиролцсон бол урьдчилгааг аялал эхлэх өдөр шилжүүлнэ. Үлдэгдлийг (урьдчилгаа тохиролцоогүй бол бүх дүнг) аялагч болон үйлчилгээ үзүүлэгч хоёулаа аялал дууссаныг 8.12-т заасны дагуу баталгаажуулсны дараагийн өглөө шилжүүлэхээр төлөвлөнө. Аль нэг тал аялал дуусах өдрөөс хойш 3 хоногийн дотор баталгаажуулаагүй бол түүнийг баталгаажуулсанд тооцно. Аялагч 8.13-т заасны дагуу асуудал мэдэгдсэн бол Асуу Цэг Апп ХХК шийдвэрлэх хүртэл үлдэгдлийг шилжүүлэхгүй. Үйлчилгээ үзүүлэгчид ногдох бүх төлбөрийг банкаар, гүйлгээний тайлбарт захиалгын дугаарыг бичиж шилжүүлнэ. Мөнгө дансанд орох өдөр банкны ажлын цаг, банк хоорондын гүйлгээний журмаас хамаарна.

7.5. Үйлчилгээ үзүүлэгчид ногдох төлбөрийг зөвхөн түүнтэй холбогдсон, «Батлагдсан» бөгөөд «Идэвхтэй» төлөвтэй Харилцагчид шилжүүлнэ. Ийм Харилцагчгүй үйлчилгээ үзүүлэгч захиалга авч болно. Гэхдээ түүнд ногдох төлбөр ийм Харилцагч холбогдох хүртэл хүлээгдэнэ. Хүлээгдсэн хугацаанд хүү тооцохгүй.

7.6. Харилцагчийг холбох, холболт таслахад дараах журам үйлчилнэ:

• үйлчилгээ үзүүлэгч Харилцагчийн регистрийн дугаараар холбох хүсэлт илгээх буюу урилга явуулах бөгөөд Харилцагч зөвшөөрсний дараа холбогдоно;
• Харилцагч үйлчилгээ үзүүлэгчийн нэгэн адил баталгаажуулалт хийлгэнэ;
• батлагдсан Харилцагчийн банкны мэдээлэл өөрчлөгдвөл дахин баталгаажуулах хүртэл төлбөр шилжүүлэхийг түр зогсооно;
• үйлчилгээ үзүүлэгч Харилцагчтай холболт таслах хүсэлт гаргасан үеэс эхлэн түүнд төлбөр шилжүүлэхгүй. Энэ нь хүсэлт шийдвэрлэгдэж, үйлчилгээ үзүүлэгч төлбөр хүлээн авахыг дахин сэргээх хүртэл үргэлжилнэ. Маргаантай тохиолдолд Асуу Цэг Апп ХХК хоёр талтай ярилцаж шийдвэрлэнэ.

7.7. Харилцагч хүлээн авсан төлбөртэй холбоотой татварын болон хуулиар хүлээсэн бусад үүргээ өөрөө хариуцна. Хууль тогтоомжоор Асуу Цэг Апп ХХК-д татвар суутгах, тайлагнах үүрэг ногдуулсан бол бид уг татварыг суутгаад үлдсэн дүнг шилжүүлнэ.

7.8. Аялагч захиалгаа 10.3-ын «а» заалтын дагуу (аялал эхлэх өдөр хүртэл 3 ба түүнээс дээш хуанлийн хоног үлдсэн үед) цуцалбал тухайн захиалгын төлбөрийг үйлчилгээ үзүүлэгчид шилжүүлэхгүй. 3-аас цөөн хуанлийн хоног үлдсэн үед цуцалбал үйлчилгээ үзүүлэгчид ногдох төлбөрийг хуваарийн дагуу шилжүүлнэ.

7.9. Үйлчилгээ үзүүлэгчийн торгууль болон 7.11-д заасан буцаан төлөх дүнг түүнд шилжүүлэх дараагийн төлбөрөөс суутгана. Суутгах боломжтой төлбөр байхгүй бол Асуу Цэг Апп ХХК уг дүнг хуульд заасан журмаар нэхэмжлэх эрхтэй. Торгууль, буцаан төлөх дүн нь шилжүүлэх төлбөрийг бүрэн нөхөж байвал тухайн төлбөрийг банкаар шилжүүлэхгүй, суутгалаар тооцоо дуусна.

7.10. Захиалгын талаар аялагч гомдол гаргасан бол Асуу Цэг Апп ХХК гомдол шийдвэрлэгдэх хүртэл тухайн захиалгын төлбөрийг үйлчилгээ үзүүлэгчид шилжүүлэхийг саатуулж болно. Гомдлын дагуу аялагчид буцаан олгосон дүнг үйлчилгээ үзүүлэгчид ногдох дүнгээс хасна.

7.11. Урьдчилгаа шилжүүлсний дараа захиалга 11 дүгээр зүйлийн дагуу цуцлагдсан, эсхүл 11.7-д заасны дагуу аялагчид буцаалт хийсэн бол үйлчилгээ үзүүлэгч хүлээн авсан урьдчилгааг, эсхүл үзүүлээгүй үйлчилгээнд ногдох хэсгийг Асуу Цэг Апп ХХК-д буцаан төлнө. Бид уг дүнг 7.9-д заасны дагуу дараагийн төлбөрөөс суутгаж болно. Асуу Цэг Апп ХХК-ийн, эсхүл банкны алдаагаар нэг төлбөрийг давхар шилжүүлсэн, эсхүл цуцалсан шилжүүлгийг банк биелүүлсэн бол үйлчилгээ үзүүлэгч илүү хүлээн авсан дүнг бидний мэдэгдлийн дагуу буцаан шилжүүлнэ. Буцаан шилжүүлэх хүртэл бид уг дүнг 7.9-д заасны дагуу дараагийн төлбөрөөс суутгаж болно.

8. Захиалгын үйл явц

8.1. Аялагч үйлчилгээ үзүүлэгч, эсхүл хуваарьт аяллыг сонгоод захиалгын маягтад дараах мэдээллийг оруулна:

• хөтөч захиалахад: аяллын эхний болон сүүлийн өдөр (энэ хоёр өдөр захиалгад багтана), аялагчдын тоо (хөтчийн заасан дээд хэмжээнээс хэтрэхгүй);
• буудаллах газар захиалахад: орох, гарах өдөр, нэгжийн төрөл, нэгжийн тоо, аялагчдын тоо; хүн тутмаар үнэлдэг нэгжийг бүтнээр нь авах сонголт байвал түүнийг;
• хуваарьт аялалд: насны ангилал тус бүрээр аялагчдын тоо;
• үйлчилгээ үзүүлэгчид илгээх захиалгын мессеж (заавал биш).

8.2. Нэг захиалга хэр удаан үргэлжлэх, хэр урьдчилан захиалж болох нь Платформын хязгаарт багтах ёстой. Сонгосон огноо энэ хязгаараас хэтэрвэл Платформ огноог хязгаарт тааруулж богиносгож болно. Иймд захиалга илгээсний дараа захиалгын хуудсанд харагдах огноог шалгана уу. Өнгөрсөн өдрөөр захиалга хийх боломжгүй. Буудаллах газар хамгийн бага, хамгийн их хоногийн тоо тогтоож болно. Хуваарьт аяллын худалдаа аялал эхлэх өдрөөс 3 хоногийн өмнө хаагдана.

8.3. Захиалгын нийт үнийг захиалга илгээх мөчид хүчинтэй байсан үйлчилгээ үзүүлэгчийн үнээр тооцож тогтооно. Тогтоосон үнэ дараа нь өөрчлөгдөхгүй. Маягтыг нээснээс хойш үйлчилгээ үзүүлэгч үнээ өөрчилсөн бол маягтад харагдсан үнэ биш, илгээх мөчийн үнэ хүчинтэй бөгөөд түүнийг «Миний захиалгууд» хэсэг дэх захиалгын хуудсанд харуулна. Төлбөр төлөхөөс өмнө захиалгын хуудсан дахь нийт үнийг шалгана уу. Үнэ тохирохгүй бол 10.2-т заасны дагуу төлбөргүй цуцалж болно.

8.4. Захиалгын дараагийн шат захиалгын төрлөөс хамаарна:

• хөтөч: аль нэг өдөр «Завгүй», эсхүл өөр захиалгад хадгалагдсан бол захиалга хийх боломжгүй. Сонгосон бүх өдөр «Нээлттэй» бол захиалга шууд «Төлбөр хүлээж буй» төлөвт шилжинэ. Аль нэг өдөр тэмдэглээгүй бол захиалга «Хүсэлт» болж хөтөчид очно. Хөтөч Платформд заасан хугацаанд хүлээн авбал «Төлбөр хүлээж буй», татгалзвал «Татгалзсан» төлөвт шилжинэ. Хариулаагүй бол «Хугацаа дууссан» төлөвт шилжинэ;
• буудаллах газар: сонгосон бүх хоногт хүссэн тооны нэгж сул бол захиалга шууд «Төлбөр хүлээж буй» төлөвт шилжинэ, эс бөгөөс захиалга хийх боломжгүй;
• хуваарьт аялал: суудал хүрэлцэж, худалдаа хаагдаагүй бол захиалга шууд «Төлбөр хүлээж буй» төлөвт шилжинэ. Нэг аялагч нэг хуваарьт аялалд нэг идэвхтэй захиалгатай байна.

8.5. «Төлбөр хүлээж буй» захиалгын төлбөрийг захиалгын хуудсанд заасан хугацаанд төлнө. Хугацаандаа төлөөгүй захиалга «Хугацаа дууссан» болж хаагдана. Хуваарьт аяллын төлбөрийн хугацаа худалдаа хаагдах өдрөөс хэтрэхгүй.

8.6. Ижил өдөр, хоног, суудлыг төлбөр нь хамгийн түрүүнд баталгаажсан захиалга авна. Хүсэлт илгээх, үйлчилгээ үзүүлэгч хүсэлтийг хүлээн авах нь өдрүүдийг тухайн аялагчид хадгалахгүй. Ижил өдрүүдэд хийсэн бусад төлөгдөөгүй захиалга «Боломжгүй болсон» төлөвт шилжин хаагдана.

8.7. Төлбөр баталгаажмагц захиалга «Баталгаажсан» төлөвт шилжиж, аялагч болон үйлчилгээ үзүүлэгчид мэдэгдэнэ. Энэ үеэс талууд бие биеийнхээ холбоо барих мэдээллийг 18.2-т заасны дагуу харна.

8.8. Аялагч нэг үйлчилгээ үзүүлэгчийн давхацсан өдрүүдэд «Хүсэлт», «Төлбөр хүлээж буй», «Баталгаажсан» төлөвтэй хоёр захиалгыг зэрэг байлгах боломжгүй.

8.9. Аялал дуусах өдөр өнгөрмөгц захиалга автоматаар «Дууссан» төлөвт шилжинэ. «Дууссан» төлөв нь үйлчилгээг зохих ёсоор үзүүлсэн гэдгийг нотлохгүй; үүнийг 8.12, 8.13-т заасан баталгаажуулалт, асуудлын журмаар тогтооно.

8.10. Захиалгын төлөв, хугацаа, төлбөр, буцаалтын мэдээллийг «Миний захиалгууд» хэсэгт харуулна. Захиалгын төлвүүд:

• Хүсэлт — үйлчилгээ үзүүлэгчийн хариуг хүлээж байна;
• Төлбөр хүлээж буй — аялагч төлбөрөө төлөх ёстой;
• Баталгаажсан — төлбөр төлөгдөж, өдрүүд аялагчид хадгалагдсан;
• Дууссан — аялал дууссан;
• Татгалзсан — үйлчилгээ үзүүлэгч хүсэлтээс татгалзсан;
• Хугацаа дууссан — хариу, эсхүл төлбөр хугацаандаа ирээгүй;
• Боломжгүй болсон — өөр захиалга ижил өдрүүдийг түрүүлж төлсөн;
• Цуцлагдсан — аялагч, үйлчилгээ үзүүлэгч, эсхүл Асуу Цэг Апп ХХК цуцалсан;
• Алдагдсан — төлбөр ирэхээс өмнө өдрүүдийг өөр захиалга авсан тул төлбөрийг бүрэн буцаана.

8.11. Захиалга илгээж, төлбөр төлснөөр та захиалга илгээх өдөр хүчин төгөлдөр байсан энэхүү Нөхцөл (25.5), тэр дундаа 10–13 дугаар зүйлд заасан цуцлалт, буцаалтын журмыг хүлээн зөвшөөрнө.

8.12. Аялал дуусах мөчид — аялал дуусах өдрийн 12:00 цагт, буудаллах газрын хувьд гарах цагаас нэг цагийн өмнө — Платформ аялагч болон үйлчилгээ үзүүлэгчид «Аялал дуусаж байна» мэдэгдэл илгээнэ. Аялагч «Аялал амжилттай дууслаа» гэж баталгаажуулах, од өгөх, зургаа цомогт оруулах, санал хүсэлт илгээх, эсхүл асуудал мэдэгдэх боломжтой. Үйлчилгээ үзүүлэгч, эсхүл түүний ажилтан аялал дууссаныг удирдах хэсгээс баталгаажуулна. Хоёр тал хоёулаа баталгаажуулмагц, эсхүл аль нэг тал аялал дуусах өдрөөс хойш 3 хоногийн дотор хариу өгөөгүй бол тухайн захиалгын төлбөр тооцоо 7.4-т заасны дагуу хаагдана.

8.13. Аялагч үйлчилгээг үзүүлээгүй, эсхүл захиалгад зааснаас ноцтой зөрүүтэй үзүүлсэн гэж үзвэл «Аялал дуусаж байна» мэдэгдэл ирснээс хойш үлдэгдэл үйлчилгээ үзүүлэгчид шилжих хүртэл «Миний захиалгууд» хэсгээс «Асуудал мэдэгдэх» товчоор юу болсныг бичиж мэдэгдэнэ. Асуудал мэдэгдмэгц үлдэгдлийг шилжүүлэхгүй бөгөөд үйлчилгээ үзүүлэгч болон Асуу Цэг Апп ХХК-д мэдэгдэнэ. Асуу Цэг Апп ХХК хоёр талын тайлбар, баримтыг үндэслэн 23 дугаар зүйлд заасан хугацаанд дараах шийдвэрийн аль нэгийг гаргана: үйлчилгээ үзүүлэгчид үлдэгдлээс хэтрэхгүй торгууль ногдуулах, аялагчид төлсөн дүнгээс хэтрэхгүй буцаалт хийх, хоёуланг нь, эсхүл аль нь ч биш. Шийдвэр, түүний тайлбарыг хоёр талд мэдэгдэж, захиалгын хуудсанд харуулна. Үлдэгдэл шилжсэний дараа илэрсэн асуудлаар гомдлыг 23 дугаар зүйлийн дагуу гаргана.

9. Үнэ, валют, төлбөр

9.1. Үйлчилгээний үнийг үйлчилгээ үзүүлэгч тогтооно. Хөтчийн захиалгын нийт үнэ нь захиалсан өдөр бүрийн үнэ болон «Нээлттэй» өдрийн нэмэлт төлбөрийн нийлбэр байх бөгөөд аялагчдын тооноос хамаарахгүй. Буудаллах газрын захиалгын нийт үнэ нь хоног бүрийн үнийн нийлбэр байна: нэгжээр үнэлдэг нэгжид нэгжийн үнийг нэгжийн тоогоор, хүн тутмаар үнэлдэг нэгжид хүний үнийг аялагчдын тоогоор (бүтнээр нь авбал бүтэн нэгжийн үнийг нэгжийн тоогоор) үржүүлнэ; тухайн хоногт тогтоосон үнийн нэмэгдэл, хөнгөлөлт орно. Хуваарьт аяллын нийт үнэ нь насны ангилал бүрийн үнийг тухайн ангиллын аялагчдын тоогоор үржүүлсэн нийлбэр байна.

9.2. Бүх үнийг Монгол төгрөгөөр (₮) илэрхийлж, төлбөр тооцоог төгрөгөөр хийнэ. Бид ам.доллараар болон бусад валютаар төлбөр авахгүй. Үнийн хажууд харуулах ам.долларын дүн нь ойролцоо ханшаар тооцсон, зөвхөн мэдээллийн зориулалттай дүн бөгөөд төлөх дүн биш.

9.3. Гадаад валютын данснаас төлсөн бол таны банк дүнг өөрийн ханшаар хөрвүүлж, шимтгэл авч болно. Энэ ханш, шимтгэлийг Асуу Цэг Апп ХХК тогтоодоггүй бөгөөд түүнээс орлого олдоггүй.

9.4. Платформд харуулсан нийт үнэ нь аялагчийн төлөх эцсийн дүн юм. Үүнд Платформын шимтгэл, холбогдох татвар багтсан бөгөөд үнэ дээр нэмж хураамж авахгүй. Захиалга цуцлахад суутгах дүнг 10 дугаар зүйлд заасан. Үнэд зөвхөн үйлчилгээ үзүүлэгчийн хуудсанд болон захиалгад заасан үйлчилгээ багтана. Тусгайлан заагаагүй бол тээвэр, хоол, буудаллах газрын төлбөр, үзвэрийн тасалбар, зөвшөөрөл, даатгал, хувийн зардал үнэд багтахгүй.

9.5. Төлбөрийг 9.7-д зааснаас бусад тохиолдолд зөвхөн захиалгын төлбөрийн хуудсанд санал болгож буй хэрэгслээр төлнө (жишээ нь QPay-ийн QR код, банкны апп). Банкны картаар төлөх боломж нээгдсэн үед картын мэдээллийг зөвхөн банкны төлбөрийн хуудсанд оруулна. Асуу Цэг Апп ХХК картын мэдээллийг харахгүй, хадгалахгүй.

9.6. «Төлөх» товчийг дарахад захиалгын өдрүүдийг төлбөр хийгдэх хүртэл богино хугацаагаар танд хадгална. Хадгалах хугацааг төлбөрийн хуудсанд харуулна. Энэ хугацаанд төлбөр ирээгүй бол өдрүүд чөлөөлөгдөнө. Захиалгын төлбөр төлөх хугацаа дуусаагүй бол төлбөрийг дахин эхлүүлж болно.

9.7. Төлбөрийг төлбөрийн байгууллага баталгаажуулсан үед л төлөгдсөнд тооцно. Гүйлгээний баримт, дэлгэцийн зураг илгээсэн нь төлбөр баталгаажсан гэсэн үг биш. Онцгой тохиолдолд Асуу Цэг Апп ХХК info@asuu.travel хаягаас бичгээр зааварласан, Асуу Цэг Апп ХХК-ийн нэр дээрх дансанд хийсэн шилжүүлгийг шалгаж, захиалгад бүртгэж болно. Үйлчилгээ үзүүлэгчийн, эсхүл хувь хүний дансанд хийсэн төлбөрийг Платформын төлбөрт тооцохгүй.

9.8. Төлбөрийг зөвхөн «Миний захиалгууд» хэсэгт байгаа тухайн захиалгын төлбөрийн хуудаснаас төлнө үү. Картын дугаар, ПИН код, нэг удаагийн нууц үгээ хэнд ч бүү өгөөрэй (19.6).

9.9. Төлбөр ирэхээс өмнө захиалгын өдрүүдийг өөр захиалга авсан бол захиалга «Алдагдсан» болж, төлсөн дүнг бүрэн буцаана. Хаагдсан захиалгад төлбөр ирсэн, эсхүл нэг захиалгад давхар төлсөн бол тухайн төлбөрийг бүрэн буцаана. Нийт үнээс илүү төлсөн бол илүү төлсөн дүнг буцаана. Буцаалтыг 12 дугаар зүйлд заасны дагуу хийнэ.

9.10. Төлбөрийн баримтыг хууль тогтоомжийн дагуу олгоно.

10. Аялагч захиалгаа цуцлах

10.1. Аялагч захиалгаа «Миний захиалгууд» хэсгээс цуцална.

10.2. Төлбөр нь төлөгдөөгүй («Хүсэлт», «Төлбөр хүлээж буй» төлөвтэй) захиалгыг хэдийд ч, ямар нэг зардалгүйгээр цуцалж болно.

10.3. Төлбөр нь төлөгдсөн захиалгыг аялагч цуцлахад дараах журам үйлчилнэ:

• а) цуцалсан өдрөөс аялал эхлэх өдөр хүртэл 3 ба түүнээс дээш хуанлийн хоног үлдсэн бол төлсөн дүнгийн 85 хувийг буцаан олгоно. Үлдсэн хэсэг нь цуцлалтын хураамж болж Асуу Цэг Апп ХХК-д үлдэнэ. Энэ нь Асуу Цэг Апп ХХК-ийн захиалга, төлбөр, буцаалтыг боловсруулсан зардлыг урьдчилан тооцсон нөхөн төлбөр юм;
• б) 3-аас цөөн хуанлийн хоног үлдсэн бол төлсөн дүнг буцаан олгохгүй. Энэ тохиолдолд үйлчилгээ үзүүлэгчид ногдох төлбөрийг 7.8-д заасны дагуу шилжүүлнэ.

10.4. Үлдсэн хоногийг цуцалсан өдрөөс аялал эхлэх өдөр хүртэлх хуанлийн хоногоор тоолно (2.2). Жишээ: аялал 2026-10-10-нд эхлэх бөгөөд аялагч 1,000,000 ₮ төлсөн. Аялагч 2026-10-07 буюу түүнээс өмнө цуцалбал 850,000 ₮ буцаан олгоно. 2026-10-08, эсхүл 2026-10-09-нд цуцалбал буцаалт хийхгүй.

10.5. Төлбөр нь төлөгдсөн захиалгыг аялал эхлэх өдөр болон түүнээс хойш аялагч Платформоор цуцлах боломжгүй. Аялагч өөрийн шалтгаанаар ирээгүй, хоцорсон, аялал дуусахаас өмнө орхисон, эсхүл захиалсан үйлчилгээг бүрэн ашиглаагүй бол төлбөрийг буцаан олгохгүй. Үйлчилгээ үзүүлэгчийн буруугаас үйлчилгээг ашиглаж чадаагүй бол 11.7 үйлчилнэ.

10.6. Цуцлахын өмнө Платформ буцаан олгох хувь, дүнг харуулна. Цуцалсны дараа үйлчилгээ үзүүлэгчид мэдэгдэнэ.

10.7. Буцаалтыг 12 дугаар зүйлд заасны дагуу хийнэ.

11. Асуу Цэг Апп ХХК, эсхүл үйлчилгээ үзүүлэгч захиалга цуцлах

11.1. Үйлчилгээ үзүүлэгч «Төлбөр хүлээж буй», «Баталгаажсан» захиалгыг аялал эхлэх өдрөөс өмнө удирдах хэсгээс цуцалж болно. Цуцлахдаа шалтгаанаа бичих бөгөөд шалтгаан аялагчид харагдана. Аялал эхлэх өдөр болон түүнээс хойш захиалгыг зөвхөн Асуу Цэг Апп ХХК цуцална. Хуваарьт аяллыг цуцалбал түүний бүх идэвхтэй захиалга цуцлагдаж, төлбөр нь төлөгдсөн захиалга бүрд 11.3, 11.4 үйлчилнэ.

11.2. Асуу Цэг Апп ХХК идэвхтэй («Хүсэлт», «Төлбөр хүлээж буй», «Баталгаажсан» төлөвтэй) захиалгыг хэдийд ч, тэр дундаа аялал эхэлсний дараа ч дараах үндэслэлээр цуцалж болно:

• а) үйлчилгээ үзүүлэгч үйлчилгээгээ үзүүлэх боломжгүй болсон, эсхүл түүний бүртгэлийг түдгэлзүүлсэн, хориглосон;
• б) аялагч, үйлчилгээ үзүүлэгчийн амь нас, эрүүл мэнд, аюулгүй байдалд эрсдэл үүссэн;
• в) 22 дугаар зүйлд заасан давагдашгүй хүчин зүйл тохиолдсон;
• г) залилан, энэхүү Нөхцөлийг ноцтой зөрчсөн гэж үзэх үндэслэл бий болсон;
• д) Платформын техникийн алдаанаас үнэ, огноо, үйлчилгээ үзүүлэгчийн мэдээлэл илт буруу харагдсан;
• е) хууль тогтоомжоор шаардсан.

11.3. Асуу Цэг Апп ХХК, эсхүл үйлчилгээ үзүүлэгч төлбөр нь төлөгдсөн захиалгыг цуцалсан бол аялагчид төлсөн дүнгийнх нь 100 хувийг буцаан олгоно. Аялагч буцаалтын оронд уг мөнгөө өөр үйлчилгээний захиалгад шилжүүлж болно (13 дугаар зүйл).

11.4. Төлбөр нь төлөгдсөн захиалгыг үйлчилгээ үзүүлэгч цуцалсан бол тухайн захиалгын төлбөрийг түүнд шилжүүлэхгүй бөгөөд түүнд торгууль ногдуулж болно. Торгууль нь тухайн захиалгын нийт үнийн тогтоосон хувьтай тэнцэх бөгөөд торгуулийн хувь, дүнг цуцлахаас өмнө удирдах хэсэгт харуулна. Торгуулийг үйлчилгээ үзүүлэгчид шилжүүлэх дараагийн төлбөрөөс суутгана (7.9). Торгуулийг аялагчаас авахгүй, буцаалтаас суутгахгүй.

11.5. Төлбөр нь төлөгдөөгүй захиалгыг үйлчилгээ үзүүлэгч цуцалсан, эсхүл хүсэлтээс татгалзсан бол мөнгөн тооцоо үүсэхгүй. Энэ тухай аялагчид мэдэгдэнэ.

11.6. Захиалга цуцлагдсанаас аялагчид бусад зардал (нислэг, тээвэр, буудаллах газрын захиалга, визийн зардал зэрэг) гарч болно. Асуу Цэг Апп ХХК ийм зардлыг 21 дүгээр зүйлд заасан хязгаараас хэтрүүлэн хариуцахгүй.

11.7. Үйлчилгээ үзүүлэгч баталгаажсан захиалгын үйлчилгээг огт үзүүлээгүй нь тогтоогдвол түүнийг үйлчилгээ үзүүлэгч цуцалсанд тооцож 11.3, 11.4 үйлчилнэ. Үйлчилгээг хэсэгчлэн, эсхүл захиалгад зааснаас ноцтой зөрүүтэй үзүүлсэн бол аялагч 8.13-т заасны дагуу асуудал мэдэгдэх бөгөөд Асуу Цэг Апп ХХК үзүүлээгүй хэсэгт ногдох дүнг аялагчид буцаан олгох, үйлчилгээ үзүүлэгчид торгууль ногдуулах эсэхийг шийднэ.

12. Буцаалт хийх журам

12.1. Буцаалтыг дараах тохиолдолд хийнэ:

• а) аялагч 10.3-ын «а» заалтын дагуу захиалгаа цуцалсан — төлсөн дүнгийн 85 хувь;
• б) Асуу Цэг Апп ХХК, эсхүл үйлчилгээ үзүүлэгч төлбөр нь төлөгдсөн захиалгыг цуцалсан бөгөөд аялагч өөр үйлчилгээнд шилжүүлэхийн оронд буцаалт сонгосон — төлсөн дүнгийн 100 хувь;
• в) захиалга «Алдагдсан» болсон, хаагдсан захиалгад төлбөр ирсэн, эсхүл давхар, илүү төлсөн — тухайн төлбөрийн 100 хувь, эсхүл илүү төлсөн дүн;
• г) өөр үйлчилгээнд шилжүүлэхэд шинэ захиалгын нийт үнэ шилжүүлсэн дүнгээс бага байсан — үнийн зөрүү;
• д) Асуу Цэг Апп ХХК 8.13, эсхүл 11.7-д заасны дагуу буцаалт хийхээр шийдсэн — шийдвэрт заасан дүн.

12.2. Буцаалт авахын тулд аялагч Платформ дахь буцаалтын маягтыг бөглөнө. Маягтад мөнгө хүлээн авах банк, дансны дугаар, данс эзэмшигчийн нэрийг оруулна.

12.3. Бид буцаалтын дүнг маягтад заасан дансанд Монгол төгрөгөөр шилжүүлнэ. Буцаалтыг QPay, эсхүл банкны картын гүйлгээг буцаах замаар хийхгүй.

12.4. Аялагч маягтад үнэн зөв мэдээлэл оруулах үүрэгтэй. Данс эзэмшигч нь аялагч, эсхүл тухайн төлбөрийг төлсөн этгээд байна. Бусад тохиолдолд бид нэмэлт баталгаа шаардана. Аялагчийн оруулсан буруу мэдээллийн улмаас шилжүүлэг саатсан, эсхүл буруу дансанд шилжсэнийг Асуу Цэг Апп ХХК хариуцахгүй. Шаардлагатай бол бид данс эзэмшигчийг тодруулах, нэмэлт мэдээлэл шаардах эрхтэй.

12.5. Бид бүрэн бөглөсөн маягтыг хүлээн авснаас хойш буцаалтыг аль болох богино хугацаанд шилжүүлнэ. Мөнгө дансанд орох хугацаа нь банк хоорондын гүйлгээний журмаас хамаарна.

12.6. Мөнгө шилжүүлсний дараа аялагчид имэйлээр мэдэгдэж, захиалгын хуудсанд буцаалтын төлвийг харуулна.

12.7. Нэг төлбөрт нэг удаа буцаалт хийнэ. Буцаалт удааширсан гэж үзвэл 23 дугаар зүйлд заасны дагуу хандана уу.

12.8. Асуу Цэг Апп ХХК өөрийн банкны шилжүүлгийн шимтгэлийг хариуцна. Гадаад улсын банкны дансанд шилжүүлэхэд зуучлагч болон хүлээн авагч банкны шимтгэл, валют хөрвүүлэлтээс шалтгаалан хүлээн авах дүн багасч болно.

13. Захиалгыг өөрчлөх, өөр үйлчилгээнд шилжүүлэх

13.1. Захиалгын огноо, аялагчдын тоог Платформд өөрчлөх боломжгүй. Өөрчлөх шаардлагатай бол аялагч захиалгаа 10 дугаар зүйлд заасан журмаар цуцалж, шинээр захиална.

13.2. Аялагч өөрчлөлтийн талаар бидэнтэй холбогдож болно. Бид үйлчилгээ үзүүлэгчтэй хамт боломжит шийдлийг авч үзэж болох ч өөрчлөлт хийх баталгаа гаргахгүй.

13.3. Аяллын явцад цаг агаар, замын нөхцөл, аюулгүй байдлын шаардлагаар үйлчилгээ үзүүлэгч маршрут, хуваарийг өөрчилж болно. Энэ тохиолдолд үйлчилгээ үзүүлэгч боломжтой бол адил төстэй хувилбар санал болгоно. Өөрчлөлт ноцтой бөгөөд аялагч зөвшөөрөхгүй бол 23 дугаар зүйлийн дагуу бидэнд мэдэгдэх бөгөөд 11.7 үйлчилнэ.

13.4. 11.3-т заасны дагуу аялагч буцаалтын оронд мөнгөө Платформ дахь өөр үйлчилгээний захиалгад шилжүүлж болно. Ингэж шилжүүлэхэд 13.5–13.8 үйлчилнэ.

13.5. Аялагч буцаалт хүсээгүй бол цуцлагдсан захиалгын төлсөн дүн түүний дараагийн захиалгын маягтад тооцогдох дүн болж харагдана. Аялагч тэр захиалгыг илгээснээр мөнгөө шилжүүлэхийг сонгосонд тооцно. Уг дүнг ашигласан захиалга хүлээгдэж байх үед буцаалт сонгох бол эхлээд тэр захиалгыг цуцална. Тооцох дүн, нэмж төлөх дүнг захиалгын маягтад харуулна.

13.6. Шилжүүлсэн дүн нь цуцлагдсан захиалгын нийт үнэ дээр түүний 15 хувийг нэмсэн дүнгээс хэтрэхгүй хэмжээгээр шинэ захиалгын нийт үнийг нөхнө; энэ нэмэгдэл 15 хувийг Асуу Цэг Апп ХХК хариуцна. Үнийн зөрүүг дараах байдлаар тооцно:

• шинэ захиалгын нийт үнэ цуцлагдсан захиалгын нийт үнээс бага бол зөрүүг 12 дугаар зүйлийн дагуу буцаан олгоно;
• шинэ захиалгын нийт үнэ цуцлагдсан захиалгын нийт үнээс 15 хувь хүртэл өндөр бол аялагч нэмж төлөхгүй;
• түүнээс өндөр бол давсан хэсгийг нэмж төлөх дүн болгож захиалгын маягтад харуулна. Аялагч түүнийг 9 дүгээр зүйлийн дагуу төлнө.

13.7. Аялагч буцаалт хүссэн бол өөр үйлчилгээнд шилжүүлэх боломж дуусгавар болно. Шилжүүлсэн шинэ захиалга баталгаажсан бол анхны захиалгын төлбөрийг буцаан олгохгүй. Харин 13.6-д заасан үнийн зөрүүг буцаан олгоно.

13.8. Шилжүүлсэн дүнгээр бүрэн, эсхүл хэсэгчлэн төлсөн захиалгыг цуцлахад 10, 11 дүгээр зүйлийг шилжүүлсэн дүнг оролцуулсан нийт төлсөн дүнд хэрэглэнэ.

14. Аялагчийн үүрэг

14.1. Аялагч дараах үүрэгтэй:

• а) өөрийн болон хамт аялагчдын бичиг баримт, зөвшөөрлийн шаардлагыг хангах, холбогдох зардлыг хариуцах. Үүнд гадаад паспорт, виз, хилийн бүсэд нэвтрэх зөвшөөрөл, тусгай хамгаалалттай газар нутагт орох зөвшөөрөл, эрүүл мэнд, вакцины шаардлага хамаарна;
• б) үйлчилгээнд нөлөөлөх мэдээллийг (хоолны онцлог хэрэгцээ, хөдөлгөөний хязгаарлалт, эрүүл мэндийн байдал зэрэг) үйлчилгээ үзүүлэгчид урьдчилан мэдэгдэх. Ерөнхий мэдээллийг захиалга илгээхдээ мессежид бичиж болно. Эрүүл мэндийн мэдээллийг зөвхөн үйлчилгээнд шаардлагатай хэмжээгээр, төлбөр төлөгдсөний дараа үйлчилгээ үзүүлэгчид утсаар шууд мэдэгдэнэ;
• в) тохиролцсон газар, цагт ирэх;
• г) үйлчилгээ үзүүлэгчийн аюулгүй ажиллагааны хууль ёсны зааварчилгааг дагах;
• д) Монгол Улсын хууль тогтоомж, нутгийн ёс заншил, малчин өрх, хувийн өмчийг хүндэтгэх;
• е) байгаль орчинд хор хохирол учруулахгүй байх: хог хаягдлаа авч явах, ан амьтан, малыг үргээхгүй байх, бэлчээр, хөрсийг эвдэхгүй байх, тусгай хамгаалалттай газар нутгийн журмыг дагах;
• ж) түүх, соёлын дурсгал, палеонтологийн олдвор, ховор ургамал, амьтныг хууль бусаар авч явахгүй байх;
• з) үйлчилгээ үзүүлэгч болон бусад аялагчдыг хүндэлж, дарамт, доромжлол үзүүлэхгүй байх.

14.2. Монголд аялахад хол зай, алслагдсан газар нутаг, эмнэлгийн тусламжийн хүртээмж муу, морь унах, малтай харьцах, хувирамтгай цаг агаар зэрэг эрсдэл тулгарч болно. Иймд аяллын үйл ажиллагааг тань хамарсан аяллын болон эрүүл мэндийн даатгалд хамрагдахыг зөвлөж байна.

14.3. Дараах тохиолдолд үйлчилгээ үзүүлэгч аялагчид үйлчилгээ үзүүлэхээс татгалзах, эсхүл үйлчилгээг зогсоож болно: аялагч өөрийн болон бусдын амь нас, эрүүл мэндэд аюул учруулсан, согтууруулах ундаа, мансууруулах бодисын нөлөөнд орсон, аюулгүй ажиллагааны зааварчилгааг дагаагүй, эсхүл хууль бус үйлдэл хийсэн. Ийм үндэслэл тогтоогдвол төлбөрийг буцаан олгохгүй. Аялагч татгалзлыг үндэслэлгүй гэж үзвэл 23 дугаар зүйлийн дагуу гомдол гаргана. Гомдол үндэслэлтэй бол 11.7 үйлчилнэ.

14.4. Аялагч өөрийн буруугаас үйлчилгээ үзүүлэгч, гуравдагч этгээдийн эд хөрөнгөд учруулсан хохирлыг хуульд заасны дагуу хариуцна.

14.5. Захиалгын мессеж болон бусад харилцаанд бусдын хувийн мэдээлэл, шаардлагагүй эмзэг мэдээлэл бичихгүй байна.

15. Үнэлгээ ба сэтгэгдэл

15.1. Үнэлгээ нь 1-ээс 5 хүртэлх од, сэтгэгдлийн аль нэгийг, эсхүл хоёуланг агуулна. Үнэлгээг зөвхөн төлбөр нь төлөгдсөн, «Баталгаажсан», эсхүл «Дууссан» төлөвтэй захиалгын аялагч бичнэ. Нэг захиалгад нэг үнэлгээ бичнэ. Үнэлгээг захиалгад нэр нь заагдсан хөтөч, буудаллах газар, эсхүл аяллын компанид өгнө.

15.2. Сэтгэгдлийг аялал эхлэх өдрөөс бичиж болно. Одыг 8.12-т заасан «Аялал дуусаж байна» мэдэгдэл илгээгдсэн мөчөөс өгнө. Хоёуланг нь аялал дуусах өдрөөс хойш 30 хоногийн дотор засаж болох бөгөөд энэ хугацааг захиалгын хуудсанд харуулна. Өгсөн одыг Платформ дээр өөрөө арилгах боломжгүй, зөвхөн өөрчилнө.

15.3. Үнэлгээ бичсэн даруй нийтлэгдэнэ. Үйлчилгээ үзүүлэгчийн нийтийн хуудсанд таны бүртгэлийн нэр, аялсан сар, од, сэтгэгдэл харагдана. Үнэлгээг нэргүйгээр нийтлэх боломжгүй тул үнэлгээ бичихээс өмнө үүнийг анхаарна уу.

15.4. Үнэлгээ нь таны бодит туршлага, өөрийн үзэл бодол байх ёстой. Дараах агуулгыг хориглоно:

• а) худал, төөрөгдүүлэх мэдээлэл;
• б) бусдын хувийн мэдээлэл (утасны дугаар, хаяг, имэйл гэх мэт);
• в) доромжилсон, заналхийлсэн, ялгаварласан үг хэллэг;
• г) зар сурталчилгаа, холбоос;
• д) хууль бус, бусдын эрхийг зөрчсөн агуулга.

15.5. Үйлчилгээ үзүүлэгч үнэлгээнд нийтэд харагдах нэг хариу бичиж, түүнийгээ засаж болно. Хариу нь хүндэтгэлтэй, 15.4-т заасан шаардлагад нийцсэн байна.

15.6. Асуу Цэг Апп ХХК энэхүү Нөхцөлийг зөрчсөн үнэлгээг нийтээс нууж болно. Нуусан шалтгааныг аялагчид мэдэгдэнэ. Зөрчил арилсан гэж үзвэл үнэлгээг дахин нийтэлж болно.

15.7. Үйлчилгээ үзүүлэгчийн дундаж үнэлгээг зөвхөн нийтлэгдсэн, од бүхий үнэлгээнээс тооцно. Нуусан болон зөвхөн сэтгэгдэлтэй үнэлгээ дундаж үнэлгээнд тооцогдохгүй.

15.8. Үйлчилгээ үзүүлэгчид дараах үйлдлийг хориглоно: үнэлгээ бичүүлэхийн тулд урамшуулал санал болгох, дарамт шахалт үзүүлэх, өөрийн үйлчилгээнд өөрөө үнэлгээ бичих, хуурамч үнэлгээ бичүүлэх.

15.9. Үнэлгээ, хариутай холбоотой санал, гомдлоо 23 дугаар зүйлд заасны дагуу гаргана.

15.10. Та үнэлгээгээ, эсхүл түүнд харагдах нэрээ устгуулах хүсэлтийг info@asuu.travel хаягаар гаргаж болно. Хүсэлтийг Хүний хувийн мэдээлэл хамгаалах тухай хуульд заасны дагуу шийдвэрлэнэ.

16. Хэрэглэгчийн контент ба оюуны өмч

16.1. Таны Платформд байршуулсан контентын (мэдээлэл, зураг, тайлбар, үнэлгээ, хариу зэрэг) эрх танд хэвээр үлдэнэ.

16.2. Контентоо байршуулснаар та Асуу Цэг Апп ХХК-д уг контентыг ашиглах онцгой бус, үнэ төлбөргүй, дэлхий даяар хүчинтэй эрх олгож байна. Энэ эрх нь Платформыг ажиллуулах, тухайн үйлчилгээ болон Платформыг сурталчлах зорилгоор контентыг хадгалах, нийтэд үзүүлэх, хуулбарлах, хэмжээ, хэлбэрийг тохируулах, орчуулахыг хамарна. Эрх нь контент Платформд байршиж байх хугацаанд болон хуульд заасан хадгалах хугацаанд хүчинтэй.

16.3. Та байршуулсан контентоо ашиглах эрхтэй, зурган дээрх хүмүүсийн зөвшөөрлийг авсан, контент тань бусдын оюуны өмч, хувийн эрхийг зөрчөөгүй гэдгийг баталж байна.

16.4. Асуу Цэг Апп ХХК хууль тогтоомж, энэхүү Нөхцөлийг зөрчсөн контентыг нуух, засварлахыг шаардах, Платформоос хасах эрхтэй.

16.5. Asuu.Travel нэр, лого, сайтын дизайн, программ хангамж, бидний бэлтгэсэн текст, зураг, мэдээллийн сангийн бүтэц нь Асуу Цэг Апп ХХК, эсхүл түүнд эрх олгогчийн өмч юм. Хуульд зөвшөөрснөөс бусад тохиолдолд бидний бичгээр өгсөн зөвшөөрөлгүйгээр тэдгээрийг хуулбарлах, өөрчлөх, түгээх, арилжааны зорилгоор ашиглахыг хориглоно.

16.6. Таны Платформын талаар өгсөн санал, зөвлөмжийг бид ямар нэг үүрэг, төлбөргүйгээр ашиглаж болно.

16.7. Зургийн цомог. Имэйл хаягаа баталгаажуулсан хэрэглэгч Платформд бүртгэлтэй хөтөч, буудаллах газар, аяллын компани, багц, эсхүл мэдээний талаар нэг удаад 10 хүртэл зургийг тайлбар, аймгийн хамт цомогт оруулж болно. Зураг шууд нийтлэгдэнэ. Оруулагч нэрээ харуулах эсэхээ сонгож, тайлбараа засаж, зургаа устгаж болно. Зургийн сэдэв болсон үйлчилгээ үзүүлэгч (эсхүл түүний ажилтан) болон Асуу Цэг Апп ХХК зөрчилтэй зургийг шалтгаанаа заан нууж болно; нуусан зургийг зөвхөн Асуу Цэг Апп ХХК дахин нийтэлнэ. Зурган дээрх хүмүүсийн зөвшөөрлийг оруулагч өөрөө авсан байна (16.3).

16.8. Мэдээний сэтгэгдэл. Имэйл хаягаа баталгаажуулсан хэрэглэгч мэдээнд сэтгэгдэл бичиж, нэрээ харуулах эсэхээ сонгоно. Сэтгэгдэл шууд нийтлэгдэх бөгөөд түүнд 15.4-т заасан шаардлага үйлчилнэ. Асуу Цэг Апп ХХК зөрчилтэй сэтгэгдлийг шалтгаанаа заан нууж болно.

17. Хориглох үйлдэл

17.1. Платформыг ашиглахдаа дараах үйлдлийг хориглоно:

• а) хуурамч бүртгэл үүсгэх, бусдын нэрийн өмнөөс эрхгүйгээр бүртгэл үүсгэх, захиалга хийх;
• б) бусдын төлбөрийн хэрэгсэл, хувийн мэдээллийг зөвшөөрөлгүй ашиглах;
• в) хуурамч үнэлгээ бичих, үнэлгээгээр дамжуулан бусдыг дарамтлах;
• г) хуанли, үнэ, үйлчилгээний мэдээллийг төөрөгдүүлэх зорилгоор оруулах;
• д) 6.5-д заасны дагуу захиалгын үйлчилгээг Платформыг тойруулан тохиролцох, төлбөрийг Платформоос гадуур авах;
• е) хууль бус, доромжилсон, садар самуун, үзэн ядалт өдөөсөн, бусдын оюуны өмчийг зөрчсөн контент байршуулах;
• ж) бусад хэрэглэгч, үйлчилгээ үзүүлэгч, Асуу Цэг Апп ХХК-ийн ажилтныг дарамтлах, заналхийлэх;
• з) Платформын хамгаалалт, нэвтрэх эрхийн хязгаарлалт, робот шалгах системийг тойрч гарах;
• и) автомат программ, скрипт ашиглан мэдээлэл цуглуулах, Платформд хэт ачаалал өгөх;
• к) хортой код тараах, Платформын үйл ажиллагаа, аюулгүй байдалд саад учруулах;
• л) хязгаарлагдсан, хориглогдсон бүртгэлийн оронд шинэ бүртгэл үүсгэх;
• м) Платформыг хууль бус зорилгоор ашиглах.

17.2. Энэ зүйлийг зөрчсөн тохиолдолд 20 дугаар зүйлд заасан арга хэмжээ авна. Учирсан хохирлыг зөрчил гаргагч хариуцна.

18. Хувийн мэдээлэл

18.1. Асуу Цэг Апп ХХК таны хувийн мэдээллийг Хүний хувийн мэдээлэл хамгаалах тухай хууль болон Нууцлалын бодлогын (asuu.travel/mn/privacy) дагуу боловсруулна. Мэдээлэл цуглуулах зорилго, хадгалах хугацаа, хэнд дамжуулах, таны эрхийг Нууцлалын бодлогод заана. Бүртгүүлэхдээ та энэхүү Нөхцөлтэй хамт Нууцлалын бодлогыг зөвшөөрнө.

18.2. Захиалгын явцад дараах мэдээллийг холбогдох талд харуулна:

• захиалга илгээх үед үйлчилгээ үзүүлэгч аялагчийн нэр, аялагчдын тоо, захиалгын мессежийг харна;
• төлбөр төлөгдсөний дараа үйлчилгээ үзүүлэгч аялагчийн имэйл хаяг, утасны дугаарыг (оруулсан бол) харна. Аялагч үйлчилгээ үзүүлэгчийн утасны дугаарыг харна.
• үйлчилгээ үзүүлэгчийн ажилтан эзэмшигчийн нэгэн адил энэ мэдээллийг харна.

18.3. Үйлчилгээ үзүүлэгчийн бичиг баримтыг 5.7-д заасны дагуу хандах эрх хязгаарлагдсан орчинд хадгална.

18.4. Бүртгүүлэх маягтуудыг автомат программаас хамгаалахад Google reCAPTCHA үйлчилгээг ашигладаг. Үүнд Google-ийн нууцлалын бодлого, үйлчилгээний нөхцөл үйлчилнэ.

18.5. Платформын мэдээлэл, файлыг Монгол Улсаас гадна байрлах үүлэн серверт хадгалж, боловсруулж болно. Дэлгэрэнгүйг Нууцлалын бодлогод заана.

19. Мэдэгдэл, харилцаа холбоо

19.1. Асуу Цэг Апп ХХК захиалга, төлбөр, буцаалт, үнэлгээ, бүртгэлийн аюулгүй байдлын гол мэдэгдлийг таны бүртгэлтэй имэйл хаяг руу илгээнэ. Захиалгын төлөв, буцаалтын мэдээллийг Платформ дахь захиалгын хуудас, удирдах хэсэгт мөн харуулна.

19.2. Мэдэгдлийг таны сайтад сонгосон хэлээр, тухайн мэдэгдэл тэр хэлээр бэлтгэгдээгүй бол англи хэлээр илгээнэ.

19.3. Бүртгэлтэй имэйл хаяг руу илгээсэн мэдэгдлийг танд хүргэгдсэнд тооцно. Иймд имэйл хаягаа идэвхтэй, шинэчлэгдсэн байлгаж, спам хавтсаа шалгаж байна уу.

19.4. Баталгаажсан имэйл хаягаа солиход одоогийн хаяг руу зөвшөөрөх холбоос илгээнэ. Хаяг солигдсоны дараа шинэ хаягаа дахин баталгаажуулна.

19.5. Захиалга, төлбөр, аюулгүй байдлын мэдэгдэл нь үйлчилгээний салшгүй хэсэг юм. Иймд бүртгэл идэвхтэй байх хугацаанд эдгээр мэдэгдлээс татгалзах боломжгүй. Сурталчилгааны мэдээллийг зөвхөн таны зөвшөөрлөөр илгээнэ.

19.6. Асуу Цэг Апп ХХК таны нууц үг, картын мэдээлэл, нэг удаагийн нууц үгийг имэйл, утас, мессежээр хэзээ ч асуухгүй. Үйлчилгээ үзүүлэгч болон бидний нэрийн өмнөөс холбогдсон хүнд ч эдгээрийг бүү өгөөрэй. Ийм хүсэлт ирвэл хариу бүү өгч, info@asuu.travel хаягаар бидэнд мэдэгдэнэ үү.

19.7. Та бидэнтэй info@asuu.travel хаягаар, эсхүл 86085522 утсаар холбогдоно (26.6).

20. Бүртгэлийг хязгаарлах, түдгэлзүүлэх, хаах

20.1. Асуу Цэг Апп ХХК дараах тохиолдолд хэрэглэгчийн болон үйлчилгээ үзүүлэгчийн бүртгэлийг хязгаарлах, түр түдгэлзүүлэх, хаах, хориглох эрхтэй:

• а) энэхүү Нөхцөлийг ноцтой, эсхүл давтан зөрчсөн;
• б) худал мэдээлэл, хуурамч бичиг баримт ирүүлсэн;
• в) залилан, хууль бус үйлдэл хийсэн гэж үзэх үндэслэл бий болсон;
• г) бусдын амь нас, эрүүл мэнд, эд хөрөнгө, Платформын аюулгүй байдалд эрсдэл учруулсан;
• д) үйлчилгээ үзүүлэгч хүсэлтэд байнга хариулаагүй, захиалгыг үндэслэлгүй давтан цуцалсан, үйлчилгээгээ үзүүлээгүй, эсхүл түүний талаар үндэслэлтэй гомдол давтан ирсэн;
• е) хууль тогтоомж, эрх бүхий байгууллага шаардсан.

20.2. Хууль зөвшөөрч, аюулгүй байдалд сөрөг нөлөөгүй бол бид шалтгааныг мэдэгдэнэ. Үйлчилгээ үзүүлэгчийн хувьд шалтгааныг удирдах хэсэгт харуулна. Та уг шийдвэрийг үндэслэлгүй гэж үзвэл 23 дугаар зүйлийн дагуу гомдол гаргаж болно.

20.3. Түдгэлзүүлсэн үйлчилгээ үзүүлэгч Платформд нийтэд харагдахгүй бөгөөд түүнд шинэ захиалга, хүсэлт ирэхгүй. Хориглосон үйлчилгээ үзүүлэгчийн мэдээллийг түүнийг дахин бүртгүүлэхээс сэргийлэх зорилгоор хадгална.

20.4. Түдгэлзүүлсэн, хориглосон үйлчилгээ үзүүлэгчийн өмнө нь хийгдсэн захиалгыг Асуу Цэг Апп ХХК тухай бүрд нь хянаж, шаардлагатай бол 11 дүгээр зүйлд заасны дагуу цуцална.

20.5. Хэрэглэгч бүртгэлээ хаалгах хүсэлтээ бүртгэлтэй имэйл хаягаасаа info@asuu.travel хаягаар илгээнэ. Бид хүсэлтийг Хүний хувийн мэдээлэл хамгаалах тухай хууль, Нууцлалын бодлогын дагуу шийдвэрлэнэ. Идэвхтэй захиалга, буцаалт, үйлчилгээ үзүүлэгчийн төлбөр тооцоо дуусаагүй бол тэдгээр дуустал бүртгэлийг хаахгүй. Хуулиар хадгалах шаардлагатай захиалга, төлбөрийн мэдээллийг бүртгэл хаагдсаны дараа ч хуульд заасан хугацаанд хадгална.

20.6. Бүртгэл хязгаарлагдах, хаагдах нь өмнө үүссэн үүргээс, тухайлбал төлбөр, торгууль, хохирол нөхөн төлөх үүргээс чөлөөлөхгүй.

21. Хариуцлагын хязгаар ба нөхөн төлбөр

21.1. Асуу Цэг Апп ХХК 3.3-т заасан үүргээ хариуцна.

21.2. Асуу Цэг Апп ХХК дараах зүйлийг хариуцахгүй:

• а) үйлчилгээ үзүүлэгчийн үзүүлсэн үйлчилгээний чанар, түүний үйлдэл, эс үйлдэхүй, түүнээс учирсан гэмтэл, хохирол;
• б) үйлчилгээ үзүүлэгчийн Платформд нийтэлсэн мэдээллийн үнэн зөв байдал (3.6-д заасан шалгалтаас бусад);
• в) 22 дугаар зүйлд заасан давагдашгүй хүчин зүйлээс үүдэлтэй хохирол;
• г) аялагчийн өөрийн буруугаас учирсан хохирол, тэр дундаа энэхүү Нөхцөл, хууль тогтоомж, аюулгүй ажиллагааны зааварчилгааг зөрчсөнөөс үүссэн хохирол;
• д) банк, төлбөрийн байгууллага, интернэт, цахилгаан зэрэг гуравдагч этгээдийн үйлчилгээний доголдол;
• е) олох ёстой байсан орлого, нислэгээс хоцорсноос учирсан хохирол болон бусад шууд бус, дагалдах хохирол.

21.3. Захиалгатай холбоотой Асуу Цэг Апп ХХК-ийн нийт хариуцлага нь тухайн захиалгад аялагчийн бидэнд төлсөн дүнгээс хэтрэхгүй.

21.4. Энэ зүйлд заасан хязгаарлалт дараах тохиолдолд үйлчлэхгүй:

• а) Асуу Цэг Апп ХХК санаатай, эсхүл ноцтой болгоомжгүй үйлдлээр учруулсан хохирол;
• б) Асуу Цэг Апп ХХК-ийн буруугаас хүний амь нас, эрүүл мэндэд учирсан хохирол;
• в) бид хувийн мэдээллийг хууль бусаар задруулсан;
• г) хуулиар хариуцлагыг хязгаарлахыг хориглосон бусад тохиолдол, түүний дотор Хэрэглэгчийн эрхийг хамгаалах тухай хуулиар аялагчид олгосон эрх;
• д) энэхүү Нөхцөлийн дагуу буцаалт хийх үүрэг.

21.5. Бид Платформыг тасралтгүй, алдаагүй ажиллуулахыг хичээнэ. Гэвч засвар, шинэчлэлт, техникийн доголдлын улмаас Платформ түр тасалдаж болох тул ийм баталгаа гаргахгүй.

21.6. Гуравдагч этгээд дараах үндэслэлээр Асуу Цэг Апп ХХК-д нэхэмжлэл гаргасан бол тухайн хэрэглэгч үүнээс үүдэн бидэнд учирсан хохирол, зардал, бусдад төлсөн нөхөн төлбөрийг хуульд заасны дагуу нөхөн төлнө:

• а) хэрэглэгч өөрийн буруутай үйлдлээр энэхүү Нөхцөл, хууль тогтоомжийг зөрчсөн;
• б) хэрэглэгч бусдын эрхийг зөрчсөн контент байршуулсан;
• в) нэхэмжлэл нь үйлчилгээ үзүүлэгчийн өөрийн үзүүлсэн үйлчилгээтэй холбоотой (энэ тохиолдолд тухайн үйлчилгээ үзүүлэгч нөхөн төлнө).

22. Давагдашгүй хүчин зүйл

22.1. Давагдашгүй хүчин зүйл гэж талуудын хяналтаас гадуур, урьдчилан харах, сэргийлэх боломжгүй нөхцөл байдлыг хэлнэ. Үүнд байгалийн гамшиг, хэвийн бус хүчтэй, аюулгүй зорчих боломжгүй болгосон цасан болон шороон шуурга, зуд, үер, түймэр, газар хөдлөлт, цар тахал, хорио цээр, төрийн байгууллагын шийдвэр, хил, зам хаагдсан байдал, дайн, үймээн хамаарна. Мөн цахилгаан, интернэт, банк, төлбөрийн системийн өргөн хүрээний тасалдал хамаарна.

22.2. Давагдашгүй хүчин зүйлийн улмаас үүргээ биелүүлж чадаагүй тал хариуцлага хүлээхгүй. Тухайн тал нөгөө талдаа аль болох даруй мэдэгдэнэ. Давагдашгүй хүчин зүйл нь хүлээн авсан төлбөрийг энэхүү Нөхцөлийн дагуу буцаан олгох үүргээс чөлөөлөхгүй.

22.3. Давагдашгүй хүчин зүйлийн улмаас аялал боломжгүй болсон бол аялагч, үйлчилгээ үзүүлэгч бидэнд мэдэгдэнэ. Үйлчилгээ үзүүлэгч ийм үед захиалгыг өөрөө цуцлахгүй. Давагдашгүй хүчин зүйлийн улмаас үйлчилгээг үзүүлэх боломжгүй болсон нь тогтоогдвол Асуу Цэг Апп ХХК захиалгыг цуцална. Ингэж цуцалсан бол аялагчид 11.3-т заасны дагуу төлбөрийг бүрэн буцаан олгох, эсхүл өөр үйлчилгээнд шилжүүлэх боломж олгох бөгөөд үйлчилгээ үзүүлэгчид торгууль ногдуулахгүй.

22.4. Үйлчилгээг үзүүлэх боломжтой хэвээр байхад аялагч өөрийн шийдвэрээр захиалгаа цуцалбал 10 дугаар зүйл үйлчилнэ.

23. Гомдол гаргах

23.1. Платформ, захиалга, төлбөр, буцаалт, үйлчилгээ үзүүлэгч, үнэлгээтэй холбоотой гомдлоо info@asuu.travel хаягаар, эсхүл 86085522 утсаар гаргана.

23.2. Гомдолдоо дараах мэдээллийг оруулна уу:

• таны нэр, бүртгэлтэй имэйл хаяг;
• захиалгын дугаар (AB-…), байгаа бол;
• асуудлын тодорхойлолт, огноо;
• нотлох баримт (зураг, гүйлгээний баримт гэх мэт);
• таны хүсэж буй шийдэл.

23.3. Аяллын явцад гарсан асуудлыг аялал дуусахыг хүлээлгүй, даруй мэдэгдэнэ үү. Ингэснээр бид асуудлыг цаг алдалгүй шийдвэрлэхэд туслах боломжтой.

23.4. Бид гомдлыг хүлээн авснаас хойш 3 ажлын өдөрт багтаан хариу өгнө. Нэмэлт шалгалт шаардлагатай бол хариудаа шийдвэрлэх хугацааг мэдэгдэнэ.

23.5. Гомдлыг шийдвэрлэхэд бид үйлчилгээ үзүүлэгчээс тайлбар, баримт шаардаж болно. Үйлчилгээ үзүүлэгч түүнийг шуурхай ирүүлнэ.

23.6. Гомдлын шийдвэрт сэтгэл хангалуун бус бол маргааныг 24 дүгээр зүйлд заасны дагуу шийдвэрлэнэ.

24. Хэрэглэх хууль, маргаан шийдвэрлэх

24.1. Энэхүү Нөхцөлийг Монгол Улсын хууль тогтоомжийн дагуу тайлбарлаж, хэрэглэнэ. Үүнд Иргэний хууль, Хэрэглэгчийн эрхийг хамгаалах тухай хууль, Хүний хувийн мэдээлэл хамгаалах тухай хууль хамаарна.

24.2. Энэхүү Нөхцөлтэй холбоотой маргааныг талууд эхлээд 23 дугаар зүйлд заасан журмаар харилцан тохиролцох замаар шийдвэрлэхийг эрмэлзэнэ.

24.3. Тохиролцоонд хүрээгүй бол маргааныг Монгол Улсын шүүх харьяаллын дагуу шийдвэрлэнэ.

24.4. Энэ зүйл нь хэрэглэгчийн эрхийг хамгаалах асуудал эрхэлсэн төрийн байгууллагад хандах таны хуулиар олгогдсон эрхийг хязгаарлахгүй.

24.5. Аялагч болон үйлчилгээ үзүүлэгчийн хоорондын үйлчилгээтэй холбоотой маргааныг тэд өөрсдөө шийдвэрлэнэ. Асуу Цэг Апп ХХК маргааныг шийдвэрлэхэд дэмжлэг үзүүлж болох ч энэхүү Нөхцөлөөр хүлээсэн үүргээс бусад хэсэгт маргааны тал болохгүй.

24.6. Энэ зүйл нь таны байнга оршин суугаа улсын хуулиар хэрэглэгчид олгосон, гэрээгээр хасах боломжгүй эрхийг хязгаарлахгүй.

25. Нөхцөлийн өөрчлөлт, хувилбар

25.1. Асуу Цэг Апп ХХК хууль тогтоомж өөрчлөгдөх, Платформын үйлчилгээ өөрчлөгдөх, шинэ төрлийн үйлчилгээ нэмэгдэх, аюулгүй байдлыг хангах үндэслэлээр энэхүү Нөхцөлийг өөрчилж болно.

25.2. Нөхцөлийн хувилбар бүр дугаартай байна. Хүчин төгөлдөр хувилбарын дугаар, хүчин төгөлдөр болсон огноог энэ хуудсанд харуулна.

25.3. Шинэ хувилбарыг энэ хуудсанд нийтэлнэ. Шинэ хувилбар хуудсанд заасан огнооноос хүчин төгөлдөр болно. Аялагч, үйлчилгээ үзүүлэгчийн эрхийг бууруулах, үүргийг нэмэгдүүлэх өөрчлөлтийг хүчин төгөлдөр болохоос дор хаяж 14 хоногийн өмнө Платформд болон бүртгэлтэй имэйл хаягаар мэдэгдэнэ. Хууль тогтоомжоор шаардсан өөрчлөлт үүнээс өмнө хүчин төгөлдөр болж болно.

25.4. Шинэ хувилбар хүчин төгөлдөр болсны дараа Платформыг үргэлжлүүлэн ашигласнаар та түүнийг хүлээн зөвшөөрсөнд тооцно. Зөвшөөрөхгүй бол Платформыг ашиглахаа зогсоож, 20.5-д заасны дагуу бүртгэлээ ямар нэг төлбөргүйгээр хаалгаж болно. Өмнө хийгдсэн захиалгад 25.5 үйлчилнэ.

25.5. Захиалга бүрд түүнийг хийх үед хүчин төгөлдөр байсан Нөхцөлийн хувилбар үйлчилнэ.

25.6. Таны бүртгүүлэх үед зөвшөөрсөн Нөхцөлийн хувилбарын дугаар, зөвшөөрсөн огноог Платформд бүртгэж хадгална.

26. Бусад заалт ба холбоо барих

26.1. Талуудын хоорондын харилцааг энэхүү Нөхцөл, Нууцлалын бодлого, захиалга болон төлбөрийн хуудсанд харуулсан нөхцөл, Асуу Цэг Апп ХХК-ийн үйлчилгээ үзүүлэгчтэй бичгээр байгуулсан гэрээ зохицуулна. Зөрчил гарвал дараах дарааллаар үйлчилнэ: бичгээр байгуулсан гэрээ (зөвхөн тухайн үйлчилгээ үзүүлэгчид), захиалгын хуудсанд харуулсан тусгай нөхцөл, энэхүү Нөхцөл. Захиалгын хуудсан дахь нөхцөл энэхүү Нөхцөлөөр аялагчид олгосон эрхийг бууруулахгүй.

26.2. Нөхцөлийн аль нэг заалт хүчин төгөлдөр бус болсон нь бусад заалтын хүчинд нөлөөлөхгүй.

26.3. Асуу Цэг Апп ХХК энэхүү Нөхцөлөөр олгогдсон эрхээ тухайн үед хэрэгжүүлээгүй нь уг эрхээсээ татгалзсан гэсэн үг биш.

26.4. Хэрэглэгч энэхүү Нөхцөлөөр хүлээсэн эрх, үүргээ бидний зөвшөөрөлгүйгээр бусдад шилжүүлэхгүй. Асуу Цэг Апп ХХК өөрчлөн байгуулалт, эрх залгамжлалын хүрээнд эрх, үүргээ шилжүүлж болно.

26.5. Нөхцөлийг хэд хэдэн хэлээр нийтэлж болно. Хэл хоорондын зөрүү гарвал монгол хэл дээрх эх давуу хүчинтэй. Гэхдээ орчуулгын зөрүү нь таны хуулиар олгогдсон эрхийг бууруулахгүй бөгөөд тодорхой бус заалтыг аялагчид ашигтайгаар тайлбарлана.

26.6. Холбоо барих:

• Асуу Цэг Апп ХХК (Asuu.Travel)
• Регистрийн дугаар: 4291263
• Хаяг: Дархан-Уул аймаг, Дархан сум, 10-р баг, 24-р хороолол, Хийморь Гарден, Асуу Цэг Апп ХХК-ын байр
• Утас: 86085522
• Имэйл: info@asuu.travel
• Вэб сайт: asuu.travel